ZUENOTTO seu SUENOTTO

ZUENOTTO seu SUENOTTO

filius Heraldi Danorum Regis, Christianam fidem amplexi, patre iam in senium vergente, sentiens Procerum magnam partem, ob susceptam religionem indignari, quod furta et latrocinia per mare, per terras, quibus insueverant, eâ lege interdicerentur: patri bellum indixit, regnô illum deturbaturus; qui ita processit ad bellum, ut militibus suis severa de servando filio suo praecepta daret. Sed victus Haraldus elabitur Iulinum, Vandaliae civitatem, ubi reparatis viribus, denuo in filium movit, non feliciori exitu. Tertio cum congresseuri viderentur, Procerum interventu proelium diremptum est. Cui rei fidens Pater, cum in terram egressus, a suis paulisper digrederetur, clam iaculô percussus, et Iulinum reductus, ibi obiit. Sed non diu paternâ successione gavisus parricida filius, ab illo tempore, vitam, omnis generis calamitatibus obnoxiam, iustitiâ illum divinâ acerrime urgente, perpetuo habuit. Vide Crantzium, l. 3. Metrop. Saxon. l. 10. etc.